ka Hmangaih che - 1

Ka Hmangaih che. 1
By Sukki Sukko

Chapter-1

"Nu, khawngaihin ka pa chu min biaksak leh rawh, pasal neih ka la duh lo," mittui luang ngiai ngiaia min melhtu, ka fanu chu ka melh ve tlawk tlawk ringawt a. "Bawihte i hriat kha, i pa thusawi chu tuma'n kan sawhsawn thei lo," ka ti sep chuan, a țap chhuak ta hawk hawk a.Ka fanu neihchhun rilru na lutuk tih hriat ngawih ngawih a țap chu, kei a nu hian tihsak theih nei ila ka va han ti tehlul em!

"Nu a ni kha ka duh lo pawh a ni lo; mahse, nu hmangaih a nei asin. College an kal lai ațang tawhin an inkawp tawh, nu, mi dang inkara tlazep nih ka duh lo, inhmangaihte țhen hrangtu nih ka duh lo," inhnit hlawp hlawpa a tih chuan ka lo kuah thlawp ringawt a. Ka nunhlui min hriatchhuahtir tu ka fanu hi ka lainat ngawih ngawih a ni.

Kum 20 mi hmeichhe harhvang ve tak Lalawmpuii; Famkima leh Ramengi fa neihchhun ka ni a, enghelh em em nei loin ka nun kha ka hmangliam ve mai mai țhin. Ka pa hian dawr lian pangngai ve tak a neia ka nu erawh chu primary school zirtirtu a ni. Chhungkaw khawsak harsa lo tak kan ni bawka  lungkham reng ka nei ngai lo, ka nun chu ka tana duhthusam piahlam mah a ni ta ve ang chu.

Ka nun nuam leh duhawm ve em em kha ka pu thurochhiah avangin mitkhap kar lekin a thamral ta mai si. Ka pu chuan a thurochhiahah a țhianpa nen an tute ve ve inneihtir tura intiamna a lo ziak tel reng a nih chu! Keia hnial theih a ni si lo, ka pa hian ka pu kha a ngaisangin a zah em em țhin a, a thusawi engmah a hnial ngailo, a kawi a ngilin a zawm vek țhin. Ka pa thu chu kan chhungkaw thu tawp a nih thin avangin, kum 20 mi lek ni chungin tuna ka pasal Rinmuanpuia; Pu Rintluanga leh     Pi Chhandami fapa upa zawk nen hian kan innei ta a ni.  Kum 8 laiin kan inthlau leh nghal; mahse, ka pasal, ka engkim ni tawh tura thu ka tiampui ngei khan ngaihzawng nghet a lo nei reng a nih chu! Kan inneih hmain engmah a sawi ngai lo a, inneih a duh loh thu pawh vawikhatmah a sawi chhuak hek lo; mahse, kan inneih zanah ngei amah chuan tlang takin min hrilh a, "Awmi, nupuia ka neih chhan che chu, ka pu thurochhiah vang ve tho a ni. Kan innei tawh a, nangma thua i chhuak a nih loh chuan țhen tumna em em che ka nei lo; mahse, hmangaih ka nei tawh a, ani lo chu hmangaih dang neih ka tum lo.bawk. Ka sawi awmzia i hria tiraw? Nupui nei reng chungin ngaihzawng ka nei dawn tihna a nih chu, i peih tawh loh chinah i chhuak mai dawn a nia," ti a min hrilh khan ka tlawm takzet; mahse, ka țhen mai mai bik dawn teuh lo ka duh lo chung, naupang takin pasal min neihtir a, naupang têa thlawi leh mai ka tum bik teuh lo.

"Țhen leh mai mai tur chein ka nei lo che," ti ve hmakin, kan inneih na chu a theih chin chin hum ve hram hram ka tum a ni. Nupa nun phei chu a ruih chang bakin kan hmang ngai lo, a vawrhtawp a thlen apiangin a bialnu hming lam chungin a rum chhuak țhin. Tihtheih em em nei lo khan, mittui tla zawih zawihin ka lo dawngsawng ve mai țhin a ni. Nupa nun kan hman ve zeuh zeuh takah chuan nau ka keng ve ta reng a. Nau ka pai aţang chuan ka pasal hnen ațanga ka dawn ngai loh ngaihsakna tlem tal ka dawn ve ka beisei a; mahse, chu pawh ka beisei thlawn mai a ni. A tan chuan hmeichhe pakhat a ruih changa a chakna hrikthlakna mai ka ni.

"Nu," ti sep ri avang chuan ka ngaituahna ram ațang chuan ka harh chhuak zawk a. "Aw, Bawihte," tiin ka mittui luang ngiai ngiai chu ka hruhul nghal sawk sawk a. "Ka pa chu, be leh lo mai rawh. Keimah vanga a hauh che ka duh lo," a ti leh phei chuan mak ti deuhin ka melh vat a. Kan fanu hriat laia inhauh hi ka duh ngai loh avangin, ka lungawi lohna tam tak pawh ngawih bo pui ka ngah ve asin; mahse, kan fanu hian kan nupa inkar boruak nuam lo tak hi a lo hre ve a ni ang e.

"Min hau dawn hleinem, țha takin ka sawipui ang a," ka tih chuan a lu thing nar nar chung chuan, " U Simon-a hian min neih a duh dawn chuang lo a,  amah nghak tawp mai ang; mahse, nu engati nge ka pa hi i la țhen loh?" a tih chuan ka meng phawk kher mai. "Nu, ka pa hian ngaihzawng a nei tih i hre ve reng a, engati nge i la țhen loh," a tih leh phei chuan mak ka ti lutuk ringawt. A fanu ngei pawhin a hriat tur khawpin an lo inzui nasa ang tih reng ka ring pha lo a ni.

"Bawihte, nupa kan ni tawh a, Pathian leh Kohhran mipui hmaah thu kan tiam tawh a, sut mai mai thiang a ni tawh lo alawm," ka tih chuan, " aih.. nu, nang chu Pathian pawhin a hrethiam ang che,  ka pa hi țhen daih rawh," ka thusawi chu pawm lo tih hriat zet hian a lo ti chhuak khawl a. Nui lui chung chuan, " i pa ka țhente chuan, nu hrawn i hrawn dawn asin i duh em ni? " ka tih leh chuan, a lu bu nghatin, " hetia hrehawm ti taka i awm ai chuan nuhrawn neih chu pawi ka ti lo, ka khawngaih che alawm," tih leh țah a rual a, ka lo kuah leh thlawp ringawt mai a ni. Chutih rual chuan, ka fanu ka lainatna pawh a zual sauh mai, a nu tan chuan nuhrawn neih pawh a pawi ti lo a nia; chu chuan làwmna aiin natna min thlen lo thei lo, chutiang ngaihtuahna hmanga a rilru a hnehna ringawt pawh chuan, a pa nena kan inkar inzawmna der depzia ka hriat chian phah vâng a ni mahna.

Ka fanu mittui chu hrukhul sak in ka nui lui deuh var var a, "Bawihte eirawng min bawlpui la, i pa kha chaw a ei chhuak dawn sia, i chawhmeh duh duh kan siam dawn nia," tia kai thoin choka lam pan chuan ka phei pui dat dat a.Eirawng bawl pah chuan a țawng siam siam a, nichin lawka kan thilsawi kha chu ngaituah ang pawhin a awm leh tawh lo a, ka lo thawhuai thung a.

Zanriah kan eizawh chuan lehkha zir turin a room lamah min chhoh san nghal a. Ka fanu hi Lalrinawmi niin tunah hian kum 19 chauh a la ni a, college a kal ve mek bawk. Ka pasalin kan fanu pasal tur atana a tih hi Simon Zosangpuia niin tlangval kum 25 bawr vel a ni tawh, Simon-a nu leh kan pate hi țhian inkawm ngeih tak an nih vang a nia, hetia kan fate inneihtir an tum, thian țha chauh ni lo inzawmna neih an duh vang a ni.

Dar 11 velah chuan kan pa chu a lo haw ve chauh a, sitting room- ah tv en pahin ka lo la nghak a, min hmuh chuan mak ti awm pawhin a awm lo hman atanga ka tihdan țhan a nih vang a ni. Engmah sawi loin room-ah a lut zui nghal a, kan nupa room hi in hnuaiah a awm a, kan fanu leh mikhual room zawng in chungah kan dah bawk.

Tv chu off zui nghalin tukverh leh kawngkharte ka check thlap hnuah room-ah chuan ka lut zui ve nghal a, kan room sofa-ah țhuin min lo melh deuh ngur bawk. " Sawi vat rawh," ti supin a kamis ban a thlep zui nghal mawlh mawlh bawk, " eng lo,  Bawihteiite inneih chungchang kha a nia," ka tih chuan a kut vai thuakin," sawi buai a ngai lo, thu tlukna ka siam tawh," tih leh thawh a rual a, ka lo thaw hak ringawt; mahse, ngawih mai mai ka tum bik tawh lo, "sawi buai a ngai alawm, kan fanu kum hi ngaituah la, chuan Simon-a pawh ngaihzawgte pawh a lo neive thei a," ka ti ve leh hmak a, " buaina tham a nih loh chu," ti nghutin bathroom lam pan tum chuan a pen zawm nghal zat a, " keimah ang a i fanu hi awm ve turin i duh em ni?" ka ti sep chu, lo hawi letin "nuam i tih viau hi," a ti leh nghut ringawt. Mak ti lutuka melh hrawkin, " nuam ti hmel ka pu em ni? Ka pasalin ngaihzawng a nei tih hre reng chung hian nuam ka tih i ring a maw?" ka aw chu a zawi tawh lem lo, ka thinrim ve em a ni.

" Hre reng chungin i chhuak duh chuang hleinem," a ti leh nghut ringawt a nih chu! Ka rin loh lutukin ka mittui a lo luang nghal zung zung a, ka mittui hru tawkin a mitah tak ka melh kar a, " a țha e, heti chen kan inchenchilh tawh a, a tawk tawh viau e, ințhen chu ka rem ti e," ka tih chuan a meng buai ve deuh nakin ka hria! " mahse, kan ințhen a nih chuan ka fanu hi pasal i neihtir tur a ni lo, i neih luihtir dawn ai chuan ka chhuahpui ang,"  a nui chhuak deuh hak a " ka fanu, i fanu chauh a ni bik lo, ka fanu pawh ani ve bawk e," a tih chuan melh hrawkin "engtik aţang khan nge i fanu a lo nih ve tak a, fanu nei ang pawhin i awm ve ngai loh kha, a ngen lawm lawm che pawhin 'i fanu kha ngaihsak rawh' i tih țhin kha. Engtik ațang khan nge i fanu a lo nih ve tak a?" ka ti ta phiar phiar a, ka ipikin ka tawt lutuk tlat a ni.

Ngawi rengin min melh deuh tawp a, "Rinmuanpui duhtawk tawh ang, tawp tawh rawh se, kan nufain ka chhuak ang a chuan nupui dang... i bialnu...i bialnu kha nei la, chuan hlim deuhin awm tawh ang u, ka ning tawh, ka chau ka chau hluah hluah tawh, " tih leh khuma thut ka rual a, ngawi rengin bathroom-ah a lut zui hmak a. Ka mittui tla chu hru hul duh tawh loin ka țap chhuak ta hawk hawk a, ka pasal hriat laia ka țah vawikhatna a ni ta hial ve ang. A hmuh lai leh a hriat laia tah ka duh ngai lo a nia; mahse,  zanin chu ka intih paukhuah ve na zawng zawng kha a bo duak ni maiin ka hria.

Ka țah zawh meuh chuan ka thawl deuh hawkin ka hria. khuma lukham pakhat leh sin tur chu lain zantin ka mutna thin sofa-ah ka mu leh nghal thân a. Ka mut hnu rei lo teah bathroom inhawng ri rak thawm chu ka hre zui nghal a, ka mut dan siam remin, " naktukah hna i kal hlanin ka lo inthiar chhuak ang. Khawngaihin Bawihtei chu pasal neih luihtir lo ang che," a hriat thiam tura sawiin puan chuan ka inkhuh zui nghal hmak a, a thawk hawk ri chu ka hria ;mahse,  engmah a sawi zawm tak lohah chuan ka thusawi kha a pawm a nih ngei ka ring bawk. A tan chuan pawmloh phal chi a ni nang, a zalen tawh dawn tlat a. Ngawi rengin a mu zui ve mai bawk a, a muhil bik lo a ni ngei ang a rawn thaw leh hawk zel.

Kei pawh chu muhil thei lo chuan ka inlet sek a, kan hun liam tawh Bawihtei ka pai lai vel chu ka ngaituah let neuh neuh a. Bawihtei ka pai ațang khan, ka pasal lak ațanga ngaihsakna dawn beisei em emin hun ka hmang ve țhin a. Nupui ka nih na anga ngaihsakna ka dawn ngai lohte kha, nu ka nih tawh dawn avangin ka beisei ve thin; mahse,  ka beisei thlawn chiang hle a ni. Naupai zawk kha zantin sofa-a ka mut a bang chuang lo, zan tlai tak taka ka pasal lo haw țhin nghakin rei tak tak ka men ve phah bawk a, chuti chung chuan ngaihsakna dawn chu khawi lamah, a awmdan a ngai reng a, a hma ai mahin a tawrh hlehawm zawk țhin.

Eng anga hrehawm pawhin awm mah ila, ka pate in lamah chuan phei ka tum ngai lo, an laka ka lungawi lohna kha a la ngai reng tlat a tin ni. Khati khawpa ka pasalin min hawisan chung pawh khan, amah thlakhlelhna ka nei tlat țhin kha ka inhrethiam ngai lo. Eng lai paw'n ka ngai em em a,  duat taka min kuah leh min fawhte kha ka thlahlel ve em em țhin a; mahse, vawikhat mah a ti ngai lo. Rui chunga a lo haw changin nupa nun kan hmang țhin chu zawng chu a lak aţanga ka dawn a ni. Ka beisei leh duh dan ni lo mah se a mi tawhna kha ka hnar phal ngai lo a, mi nep tak ang maiin a mi lem kual velna chu ka lo dawngsawng leh mai țhin a ni.

Raipuar in-chekup tur an pasalte nen inkai riala an kal ka hmuhte khan awt em emin ka lo thlir ve tawp zel a, kei ve chu kan pain ka in-checkup hun tur pawh a hre ve ngai lo a nia.

Bawihtei ka pai ațanga thla sarih a tlina in-checkup tura ka kal țum chuan ka pasal leh a bialnu Sangmallianite nen kan inhmu nawlh a,  an țhiante damdaw in awm an lo tlawh ve chu niin. Mahni nupuite checkup tur pawh kalpui hman lo khawpa buai țhin kha,  Sangmalliani nena dam lo tlawh chu a lo hman reng a nih chu ! Ka haw lutuk kha damdaw in kawta keh nawk nawk kha ka chak asin, chu em zawng ka tita bik lo, hmeichhe â tak anga lan kha ka duh bik teuh hleinem.

Thil ri rawk avang chuan ka phu zawk a, ka lo chhing ve zawk chu niin, khua pawh a lo eng uar tawh mai, peih lo zet chuan ka tho chhuak a ka mutna chu ka siam fel nghal zung zung a. Bawihtei kan neih hlim kha chuan khumah kan mu ve țhin a; mahse, kum a tlin ațang chuan a pain 'room hranah mu rawh se' a tih tlat avangin room hran kan siamsak a, kei pawh kan nupa room-a ka mut ai chuan Bawihtei room-a ka riah a tam zawk ang.

Choka ka luh chuan Bawihteii'n eirawng a lo bawl a, min hmuh chuan nui var varin, "Nu, i chawhmeh duh deuh kha ka siam asin, ka thiam ve tawh ras," a tih chuan ka lo nui hak a.

"I pa a chhuak tawh em ni?" Tia ka zawh chuan, a lu thingin, "La chhuak lo vawin chu ka kal lo ang a ti," a tih chuan mak ka ti deuh. "Apa Chuan maw, 'Simon-ate an lo kal dawn a, inneih chungchâng vêl sawi țhat a ngai dawn a, nang pawh vawiin chu class kal suh' a tia," a tih Chuan ka lu ka buk khum ringawt, Han sawi thui pui tur vak ka hre lo a tin ni. Apa Chuan eng thu tlukna nge a Siam dawn ka hre lo a ni. Nupate chu an inrawnin thu tlukna an Siam dun ṭhin ngai a nia, keini zawng Pa ber thu tlukna hi kan pawm emaw pawm lo emaw Kan zawm vek zel a ngai chu a ni sia!

"Bawihte, ka bula awm I hreh em?" Ti a ka zawh chuan mak ti deuha min melhin, "Enga tinge? Apa nen chuan in ințhen dawn  em ni?" Hlauhthawn hmel deuha a tih chuan nui lui deuh hak hak hian, "Ka bula awm i hreh em, ka ti ringawt alawm, kan inṭhen dawn ka tih loh kha," ka tih Chuan, "Nitin I bulah ka awm ziah alawm, chutiangte inzawh kher pawh a ngaih loh chu a mah se maw, inṭhen ula ka tihna ni chuang lovin, i bula awm ka duh," a tih chuan, "nizanahte kha chuan Nuhrawn hrawn pawh pawi ka ti lo i tih kha?!" Nui hak haka ka tih Chuan, "Ka ti ve mai mai anih kha, ka peih teuh lo nangmah nena rethei deuha awm pawh ka duh zawk daih, nitin dal ringawt pawh hmeh dawn i la ka duh," a tih duah Chuan ka nuih a ti za ngang mai.

Fate pawh hian hmangaiha duhsaktu, chêtzia a lan chhuahtîr tam zawk hi chu an lo hai lo a nih dawn hi. A pain a hmangaih lo e, ka tihna ni loin a pa hi chuan chetziain a lantir ngai lo a, a rilru hriat a har bawk si. A chang chuan 'a fanuah a pawm ve lo em maw ni aw' tih chang ka ngah ve ṭhin khawp mai. Ka rilru hi a dik lo nge a pa ngaituahna leh khawsazia hi kei chuan ka hrethiam ve ngâng lo a ni.

Kan titi mawlh mawlh lai chuan a pa a lo lût a, "Awmi vawiinah Simon-ate an lo kal dawn, chhuak suh ang che," a ti deuh hmuk a, min tih dan teh tawng chu ka lawm lo lutuk, ka chhuah hrat hmel si. Chhân ka tum lai tak chuan Bawihteii zawkin, "A pa chu i sawi dan kha, a nu hi chhuah hrat hmel e, 'chhuak harh ve rawh' te ti zawk ṭhin ta che," a lo tih chuan ka pawm lutuk chu ka lo nui sak a, a fanu chu a melh run ringawt mai.

"Chaw ei in peih tawh em?" Bawihteii chhâng lem lo chuan a ti ta zawk a, "Kan rualin i ei dawn em ni?" Ka tih chuan bu deuh nghatin chair pakhat chu a pawt chhuaka a țhu ve nghal a. "Peih tawh a ni mai; mahse, i ei duh zawng a awm pawh ka ring lo. Kan rualin i ei ngai si lo a, i duh zawng pawh ka hre lo,"  Bawihteii'n a tih niai chuan nui deuh hak hian, "I siam a nih chuan ka ei duh vek ka ring," a tih chuan mak kan ti dun khawp mai. Tukin chu eng nge a hriat ni a zia a danglam khawp mai, a in ngaituah harh ve ta nge Hriathiamhara a ni ringawt.

Bawihteii'n "A pa chu i mak ve e, Pathian lo kal a hnai tawh hle em mawni?!!" Ti a mak ti deuha a melh chu tum loh deuhin ka lo nui chhuak hak a, ka inthiam lo leh deuh si chuan ,"Bawihte chaw ei chu siam ang, inlêng kan neih dawn chu inpeih hma a țha ngai e," tiin ka țhutna ațanga tho chuan ka che zui nghal vat vat a. Keimahah hian hriatthiam loh phûrna mak tak ka nei a, ka pasal mize inthlak vang hi nge ni ang a, inlêng kan neih dawn vang zawk.

Tûkțhuan kan eikham ațanga rei vak loah Simon-ate chhûng chu an lo thleng ve nghal a, a nu leh pa leh amah chauh an lo kal a, Simon-ate unau hi pali niin amah hi a upa ber a, an mipa neih chhun a ni bawk. Simon-a ka hmuh rual chuan ka rilruah Rinmuanpuia nen kan inhmuh hmasak ber țum kha a lo lang nghal a, ka pasal nen inanna tam tak an neiin ka hria ni.

Simon-a nu, U Marini chuan nui sang hian, "Awmi i dam maw? Tunlai chu kan inhmu khât hle mai tiraw, in pa lah hi a lo leng țha duh si lo a," Tiin min  be hmasa leh a, " Aw, dam a lawm nangni zawk?" Ka tih Chuan an dam thu leh min ngaih thu a sawi nghal mawlh mawlh a. U Marini hi chu biak hmasakna hun ka chang ngai lo hrim hrim, amah zawk hian min be hmasa zêl a. A tawng duh siam siam sia a bula awm a nuamin a hahdam thlâk ṭhin, engtin nge kan pate nen hian an inkawm ve teh daih ni. Ani ang mi fel lutukin ka pasal Rinmuanpuiate ang a kawmngeih thei hi thil mak ve tak a ni.

In chhungah inzui lutin țhutkhawmna lam chu kan pan nghal a, ka bulah Bawihteii ṭhuin kan êp chiah sofa-ah Simon-a leh a pa an țhu a, U Marini leh kan pa an ṭhu dûn bawk a. Kan țhu fel deuh chiah tihah U Sawmpuia chuan, "Kan lo thleng chauh nangin, Kan inhmuh khawm chhan hi a pawimawh êm a, Kan sawi nghal mai ang a. Hei Mama hian inneih hi a pawm tlat lo mai a, zia lo kan ti khawp mai. In ngaih dan a ni em chu Kan hre chiah lo nain, inneih hi Kan țhulh leh mai dawn em mawni Kan ti deuh a?!!" A tih Chuan ka lo thaw huai mai, in duhna tel loa inneih hi chu țha angin lang mah se chhungrilah hian a nghet tak tak thei lo tlat a ni . Keini nupa pawh pawn lam mite tan chuan nupa awhawm tak kan ni maithei; mahse, keimahni hian kan inhre kur a, Kan thinlung inpawh loh zia leh Kan inlaichinna derdep zia.

Rinmuanpuia'n a hnial hlau zetin ka melh vat a; mahse, rin loh deuhin, "A, a innei tur ber te'n an duh lohte chuan tih theih Kan nei bik lo a nih chu,"  a ti ve ta hram a, ka lo thaw huai mai.

U Marini'n, "Awmi chu i rilru a va hah hmêl ve?" min nuih ver ver chung hian a lo ti a.

Nui deuh hâkin, " Hah lah love; mahse, kan fate hmalam hun hi kan tihchhiat sak ang tih ka hlau deuh a," ka ti ve sêp a, ka fanu hian keimah ang maiin pasalte hmangaihna leh ngaihsakna thlahlel ngawih ngawihin a awm ve ang tih hi ka hlau êm a ni. Ani chuan a hmangaih tak leh amah hmangaih em em tu nei se chhungkaw hlim leh duhawm tak din se tih hi ka duh ber.